பரஸ்பர நிதியில் செலவு(நட்டம்) (Mutual Fund Expenses)

பரஸ்பர நிதியை நாம் வாங்கும் பொழுது, நூறு ரூபாய்க்கு வாங்கினால், எல்லா சமயத்திலும் நமக்கு நூறு ரூபாய்க்கான யூனிட்டுகளைத் தருவதில்லை. பல சமயங்களில் ‘இந்த செலவு, அந்த செலவு' என்று கணக்கு காண்பித்து 97 ரூபாய், 98 ரூபாய்க்கான யூனிட்டுகளைத்தான் தருவார்கள். அதை விற்றாலும், உடனே நமக்கு 97 அல்லது 98 ரூபாய் வராது. அதிலும் ‘விற்கும் செலவு' என்று கணக்கு காண்பிப்பார்கள். இதன் விவரங்களை கீழே பார்க்கலாம்.

சில செலவுகள் தவிர்க்க முடியாதவை. சில தவிர்க்கக் கூடியவை. எல்லா செலவுகளையும் அவர்கள் கண் முன் காண்பிப்பதில்லை. சில தெளிவாகத் தெரியும், சிலவற்றை வருடாந்திர அறிக்கையின் உள்ளே புதைத்து வைத்து இருப்பார்கள். எது என்ன என்ற விவரத்தை ஒரு முறை தெளிவாகத் தெரிந்து கொள்வது நமக்கு நல்லது.

இந்த செலவுகள் அனைத்திலும் நமக்கு இழப்பு என்பதால் தலைப்பில் ‘நட்டம்' என எழுதி இருக்கிறேன். பரஸ்பர நிதி வாங்கினாலே நட்டம் என நினைக்க வேண்டாம்.

1. Entry Load. (நுழையும்?) வாங்கும் செலவு. பரஸ்பர நிதிகளை வாங்கும்பொழுது உங்களுக்கு வாங்கித்தரும் எஜண்ட் கமிஷன். இது பல சமயங்களில் 2% முதல் 2.5% வரை இருக்கும்.
   • உதாரணமாக , பங்குகளில் முதலீடு செய்யும் பரஸ்பர நிதிகளில், இது 2 முதல் 2.5% வரை இருக்கும். ஆனால், index fund எனப்படும் பரஸ்பர நிதி யில் குறைவாக இருக்கலாம். 1% அல்லது பூஜ்யமாகவும் இருக்கும். (இவையும் பங்குகளில்தான் முதலீடு செய்யும். பெரிய கம்பெனியில் மட்டும் முதலீடு செய்யும். அடிக்கடி பங்குகளை வாங்கி விற்க மாட்டார்கள்)
   • வைப்பு நிதியில் முதலீடு செய்யும் Debt fundsஇல் இது 1% அல்லது 0% ஆக இருக்கும். பெரும்பாலும் 0% ஆகத்தான் இருக்கும்.
   
   பங்கில் முதலீடு செய்யும் பரஸ்பர நிதியானாலும் (Equity funds) வைப்பு நிதியில் முதலீடு செய்யும் பரஸ்பர நிதி (Debt fund) ஆனாலும், வேறு (கலப்பு நிதி, துறைசார் நிதி) என எந்த வகை நிதி ஆனாலும், நேரடியாக நீங்கள் நிதியை வாங்கினால், இந்த கமிஷன் எடுக்க மாட்டார்கள். இது சமீபத்தில் அரசு உத்தரவுப் படி நடக்கிறது (அரசு உத்தரவு என எளிமையாக்கி சொல்கிறேன். இல்லாவிட்டால், SEBI என்றால் என்ன, அதற்கும் அரசிற்கும் உள்ள தொடர்பு என முடிவில்லாமல் எழுதிக்கொண்டே போகவேண்டி இருக்கும்). இதற்கு முன் (2007 வரை), நீங்கள் நேரடியாக வாங்கினால் கூட 'ஏஜண்ட் கமிஷனாகிய இந்த செலவை' விற்கும் நிறுவனமே வெட்கமில்லாமல் நம்மிடம் இருந்து எடுத்துக் கொண்டது.
   
   உங்களுக்கு ஒரு ஏஜண்ட் வந்து, (அ) பரஸ்பர நிதிகளின் விவரங்களை எடுத்துக் கூறி, (ஆ) உங்கள் தேவைகளைக் கணக்கில் கொண்டு, ‘இந்த நிதியில் முதலீடு செய்யுங்கள்' என உங்கள் நன்மையை முதலில் வைத்து சொன்னால் (அதாவது என்னைப்போல இருந்தால் :-) ), அவர் உங்களுக்கு உதவி செய்கிறார். குறைந்த பட்சம் உங்களுக்கு விண்ணப்ப படிவத்தை வீட்டில் கொண்டு வந்து கொடுத்து நீங்கள் நிரப்பியதை சரிபார்த்து நிறுவனத்திற்கு எடுத்து சென்றால், கொஞ்சமாவது உதவி செய்கிறார். அவருக்கு கமிஷன் கொடுப்பது சரியானது. நாமே ஆராய்ந்து முடிவுக்கு வந்து பரஸ்பர நிதியை வாங்கும்பொழுது, நிறுவனங்கள் ஒன்றுமே செய்யாமல் நம் பணத்தை எடுத்து தங்கள் பாக்கெட்டில் போட்டுக்கொளவது எந்த வகையில் நியாயம்? அதனால்தான் நிறுவனங்கள் வெட்கமில்லாமல் எடுத்துக்கொண்டன என்று சொல்கிறேன்.
   
   ஒவ்வொரு பரஸ்பர நிதியிலும், இது ”entry load" இவ்வளவு என்று வெளிப்படையாகத் தெரியும் படி கொடுத்திருப்பார்கள்.



2. Exit Load, (வெளியேறும்)விற்கும் செலவு. இது விற்கும் செலவு எனபதற்கு பதிலாக, ‘விற்பதற்கான தண்டனை' என்று சொல்லலாம். பெரும்பாலான நிறுவனங்கள் வாங்கும் செலவு பூஜ்யம் என்று சொன்னால், விற்கும் செலவில் தீட்டி விடும். இவையும் பங்கு-பரஸ்பர நிதிகளிலும், வைப்பு நிதி பரஸ்பர நிதிகளிலும் இருக்கும். பெரும்பாலும் 0% என்று இருந்தாலும், சில சமயங்களில் இது 1 அல்லது 2% ஆக இருக்கும்.
   
   பல சமயங்களில் இது condition உடன் வரும். அதாவது நீங்கள் ஒரு பரஸ்பர நிதியை வாங்கி 6 மாதத்திற்குள் விற்றால் அல்லது 3 மாதத்திற்குள் விற்றால், அல்லது 1 வருடத்திற்குள் விற்றால், விற்கும் செலவு என்ற பெயரில் 1% அல்லது 2% தர வேண்டி இருக்கும். அந்த காலக் கெடுவை தாண்டி விட்டால், இது பூஜ்யம் ஆகிவிடும்.
   
   எனது கருத்துப்படி நீங்கள் 3 வருடத்திற்கு பரஸ்பர நிதியை வைத்திருந்தால், ஏறக்குறைய எல்லா நிதிகளிலும் இது பூஜ்யம் ஆகிவிடும். அதனால் நாம் கவலைப்பட வேண்டியதில்லை.
   
   விற்கும்பொழுது நிறுவனத்திற்கு செலவு என்று ஒன்றும் கிடையாது. ஆனால், அவற்றின் திட்டம் நெடுங்காலத்திற்கு முதலீடு செய்ய வேண்டும் என்ற நோக்கத்தில் இருக்கும். நாம் உடனடியாக பணத்தை கேட்டால் அதற்கு penalty ஆக கொஞ்சம் எடுத்துக்கொள்வார்கள். இது ஓரளவு நியாயம் என நினைக்கிறேன்.
   
   எடுத்துக்காட்டாக, ஒரு நண்பரும் நீங்களும் சேர்ந்து பணம் போட்டு வியாபாரம் செய்கிறீர்கள். உங்கள் திட்டப்படி, ஆளுக்கு 1 லட்சம் போட்டு தொடங்குகிறீர்கள். ஆரம்பித்த மறு நாளே லாபம் வராது. ஒரு வருடம் கழித்துதான் போட்ட பணமே திரும்ப எடுக்க முடியும். இரண்டாம் ஆண்டிலிருந்து ஓரளவு லாபம் வரும் என்று கணக்கிடுகிறீர்கள்.
   
   6 மாதத்தில், நண்பர் வந்து ‘எனக்கு இது வேண்டாம் என்று தோன்றுகிறது. எனது ஒரு லட்சத்தை கொடுத்து விடு' என்று சொன்னால் என்ன சொல்வோம்? ‘இன்னம் ஆறு மாதம் பொறு, போட்ட பணத்தை எடுத்து விடுவோம். உனக்கும் எனக்கும் சமமாக பகிர்ந்து கொள்ளலாம்.' என்று சொல்வோம். நண்பர் ‘இல்லை, இப்பொழுதே கொடு' என்று கேட்டால் வியாபாரத்தை இழுத்து மூடி, வந்த பணத்தை பிரித்துக் கொள்வோம். அப்போது, போட்ட பணத்தைவிட கொஞ்சம் குறைவாகவே இருக்கும்.
   
   அதனால், குறிப்பிட்ட காலத்திற்குள் பணத்தை திரும்ப எடுத்தால், கொஞ்சம் penalty கொடுப்பது அநியாயமாக எனக்கு தோன்றவில்லை.
   
   ஒவ்வொரு பரஸ்பர நிதியிலும் இதுவும் வெளிப்படையாக ‘விற்கும் செலவு இவ்வளவு' என்று கொடுத்திருப்பார்கள்.
   
   அரசின்விதிப்படி, வாங்கும் செலவும் விற்கும் செலவும் சேர்த்து 6%க்கு மேல் போகக்கூடாது. ஏதோ நம் நல்ல நேரம், இதுவரை 2.5% அல்லது 3.5% மேல் நிறுவனங்கள் கேட்கவில்லை. அரசு அனுமத்தித்து இருக்கிறதே என்று மேலும் தீட்டவில்லை



3. CDSC இதுவும் மேலே சொன்ன Exit load/ விற்கும் செலவு போன்றது. இதன் விரிவு Contingent Deferred Sales Charge. தமிழில் மொழி பெயர்க்கும் அளவு முக்கியமானது இல்லை. இப்பொழுது பெரும்பாலும் நிறுவனங்கள் இதை வாங்குவதில்லை. 'விற்கும் செலவு' என்று மொத்தமாக சொல்லி விடுகிறார்கள். இதுவும், 6 மாதத்திற்குள் விற்றால் 1%, ஒரு வருடத்திற்குள் விற்றால் 0.5% என்று இருக்கும். பல வருடங்கள் வைத்திருப்பவர்களுக்கு கவலை இல்லை.
   
   இதுவும் வெளிப்படையாகக் கொடுத்திருப்பார்கள். இது கொடுக்காவிட்டால், இது பூஜ்யம் (அல்லது விற்கும் செலவில் சேர்க்கப்பட்டு விட்டது) என அறிந்து கொள்ளலாம்.
   


4. Expenses , மற்ற செலவுகள் இது பரஸ்பர நிதி நிறுவனம், ஆபிஸ் நடத்துவதற்கான செலவு. ஆபிஸில் வாடகை அங்கு வேலை செய்பவர்களுக்கு சம்பளம் இதையெல்லாம் நாம்தான் கொடுக்க வேண்டும். குறிப்பாக, நமது பரஸ்பர நிதியை நடத்துபவர் (Fund Manager) சம்பளம் இதிலிருந்துதான் போடும். இது ஒவ்வொரு நிதியிலும் ஒவ்வொரு ஆண்டிலும் மாறும்.
   
   இது எவ்வளவு என்பது வெளிப்படையாகத் தெரியாது. தோண்டித் துருவிப் பார்த்தால்தான் தெரியும். இது 1% அல்லது கீழே இருப்பது நல்லது. சில பரஸ்பர நிதிகள் சிறிய கம்பெனிகளில் (small cap) முதலீடு செய்யும். அவற்றைப் பற்றி ஆராய்ச்சி செய்து நல்ல கம்பெனியை தேர்ந்தெடுப்பது கொஞ்சம் கடினம் என்பதால், அப்படிப்பட்ட பரஸ்பர நிதிகள் expenseஐ அதிகமாக எடுத்துக் கொள்ளும்.
   



5. புது ஃபண்ட் செலவு (New Fund Offer or NFO expenses) புதிதாக ஃபண்ட் ஆரம்பிக்கும்பொழுது Initial Expenses அதாவது ”தொடங்கும் செலவுகள்” என்று கொஞ்சம் பணம் எடுத்துக்கொள்வார்கள். பழைய நிதியை அதிகம் விளம்பரம் செய்ய வேண்டியதில்லை. புதிய நிதி வருவது பற்றி எல்லோருக்கும் தெரிவிக்க விளம்பரம் செய்ய வேண்டும், எஜண்டுகளுக்கு சொல்ல வேண்டும் என்பது போன்ற செலவுகள் இதில் அடங்கும்.
   • பெரும்பாலும் புது நிதிகளில் வாங்கும் செலவு (entry load) இருக்காது. ஆனால், அதற்கு பதில் இந்த தொடங்கும் செலவு இருக்கும். இது ”வாங்கும் செலவை” விட அதிகமாக இருக்கும்.
   • நீங்கள் பழைய நிதியை நேரடியாக வாங்கினால், ‘வாங்கும் செலவு' கிடையாது. புதிய நிதியை நேரடியாக வாங்கினாலும், ஏஜண்ட் மூலம் வாங்கினாலும் ‘தொடங்கும் செலவு' உண்டு. 'புதிய நிதியை வாங்க வேண்டாம்' என்று நான் சொல்வதற்கு இதுவும் ஒரு காரணம்

சுருக்கமாக,

செலவு வகை	அளவு	வெளிப்படையாகத் தெரியுமா?	தவிர்க்க முடியுமா?	மற்ற விவரங்கள்
நுழையும்/ வாங்கும் செலவு (Entry Load)	0% முதல் 2.5% வரை	தெரியும்	நேரடியாக வாங்கினால் இந்த செலவு இல்லை
வெளியேறும்/விற்கும் செலவு (Exit Load)	0% முதல் 2% வரை	தெரியும்	குறிப்பிட்ட காலம் கழித்து (1 வருடம் அல்லது 6 மாதம் கழித்து) விற்றால் இந்த செலவு இல்லை
CDSC	0% முதல் 1% வரை	தெரியும். இது கொடுக்காவிட்டால், இதை ‘விற்கும் செலவில்' சேர்த்திருக்கிறார்கள் என்று பொருள்	குறிப்பிட்ட காலம் கழித்து (1 வருடம் அல்லது 6 மாதம் கழித்து) விற்றால் இந்த செலவு இல்லை
தொடங்கும் செலவு (initial expense)	4% வரை	தெரியாது	தவிர்க்க முடியாது	NFO வாங்காமல் இருப்பதுதான் நல்ல வழி

இந்த செலவு விவரங்களை எல்லாம் நாம் ஆர்வமாக இருக்கும்பொழுது ஒவ்வொரு நிதியிலும் எவ்வளவு என்று படிப்போம். இதே துறையில் ஈடுபடுவர்களுக்கு சில மாதங்களில் எந்த நிதியில் எந்த செலவு என்பது அத்துப்படி ஆகிவிடும். ஆனால் பெரும்பாலானவர்களுக்கு நேரம் இருக்காது. அதனால் முதலில் ஆர்வம் இருந்தாலும், பின்னர் குழப்பமே மிஞ்சும்.

அதனால், (அ) புதிய ஃபண்ட் களை வாங்க வேண்டாம். (ஆ) முதலீட்டை 3 வருடங்களுக்கு விற்க வேண்டாம் (இ) முடிந்தால், நேரடியாக நிறுவனத்திடம் வாங்கவும். இது ஒவ்வொரு பரஸ்பர நிதிக்கும் ஒரு முறை செய்ய வேண்டும். கொஞ்சம் தொல்லை பிடித்த வேலை என்றாலும், உங்களுக்கு பயனளிக்கும். குறிப்பாக, 15 அல்லது 20 வருடம் பணம் எடுக்க மாட்டேன், இது நெடுங்கால முதலீடு என்று நினைப்பவர்களுக்கு இது முக்கியம். நீங்கள் 3 அல்லது 5 வருடத்தில் எடுத்துவிட்டால், எஜண்ட் மூலம்போவதில் அவ்வளவு இழப்பு இல்லை. கொஞ்சம்தான் இழப்பு. இது இல்லாவிட்டால், entry load வாங்காத சில ஃபண்ட்கள் இருக்கின்றன. அவற்றை வாங்கலாம். (ஈ)expense அதிகம் இல்லாத பரஸ்பர நிதி எது என்று பார்த்து வாங்குவது கடினம். ஏனெனில் ஒவ்வொரு வருடமும் இது மாறும். ஏறக்குறைய எல்லா நிதிகளிலும் இது 1% இருப்பதால், இதை யோசித்து நேரத்தை வீணாக்க்காமல், போனால் போகட்டும் என்று விட்டு விடுவது நலம்.

நமக்கு ஒரு செலவைக் குறைக்க சுலபமான வழி இருந்தால் அதைக் கடைப்பிடிப்போம். வழி மிகக் கடினமானது, நாம் அடிக்கடி பார்த்து யோசித்து முடிவெடுக்க வேண்டி இருக்கும் என்றால் , பேசாமல் செலவை ஏற்றுக்கொள்வோம். இதுதான் நீண்ட காலத்தில் நமக்கு உகந்தது, நம்மால் செய்யக்கூடியது.

நிதித் திட்டமிடுதல். எடுத்துக்காட்டு 1a. (Financial Planning, Example)

ஒரு எடுத்துக்காட்டு. 30 வயதான ஒருவர், மாதம் 20000 ரூபாய் சம்பாதிக்கிறார். 60,65 வயதான் பெற்றோர். மற்றும் மனைவி, ஒரு குழந்தை (5 வயது). மனைவி வேலைக்கு போகவில்லை. பெற்றோருக்கு பென்ஷன் போல எந்த வருமானமும் இல்லை. இவர் அரசாங்க வேலை பார்த்தால் இவரது வேலை போகாது. வருமானம் நிலையானது.

இவர் பண விஷயங்களைப் பற்றி எவ்வாறு திட்டமிட வேண்டும்?

தற்போதைய மாத வருமானமும் செலவும். இவர்களுக்கு மாத செலவு. வீட்டு வாடகை 7000 ரூபாய், உணவு 3000 ரூபாய், துணி, குழந்தை பள்ளி செலவு, வண்டிக்கு பெட்ரோல் இதர செலவுகள் 5000 ரூபாய். ஆபிசில் பி.எஃப்.இல் 3000 ரூபாய் போடுகிறார். மீதி 2000 ரூபாய் தேறும். இது சேமிப்பு என எடுத்துக் கொள்வோம்.

விவரம்	செலவு
வீட்டு வாடகை	7000
உணவு	3000
இதர செலவுகள்	5000
பிராவிடண்ட் ஃபண்ட்	3000
சேமிப்பு	2000

( நான் இங்கு எழுதும் எண்கள் மிக மிகத் தோராயமானவை. வழி முறையை மட்டுமே கவனிக்கவும். ”இந்த சம்பளம் சரியில்லை, இந்த செலவுக்கணக்கு சரியில்லை, நாட்டு நடப்பு உனக்கு தெரியாதா” என்று சண்டைக்கு வர வேண்டாம்)

தற்போதைய சொத்து சேமிப்பு வங்கியில் 10000 ரூபாய் இருக்கிறது. நகைகளாக 20 பவுன் (160 கிராம்) தங்கம் இருக்கிறது. இதன் தற்போதைய மதிப்பு சுமார் 1.6 லட்சம்.

இது தவிர சொத்து என்று எதுவும் இல்லை. இன்சூரன்ஸ் எடுக்கவில்லை.


திட்டமிடுதல்.

1. முதலில் அவர் வங்கியில் சேமிப்பு கணக்கில் 30,000 ரூபாய் போட்டு வைக்க வேண்டும்.
இரண்டு மாத செலவுக்கான பணம் இருக்கும்.

2. வைப்பு நிதியில் 1 லட்சம் போட வேண்டும். இப்பொழுது பணம் இல்லையென்றால், 10 மாதம் பணம் சேர்த்து 50 ஆயிரம் அளவாவது போட வேண்டும். பெற்றோருக்கு, அல்லது
குடும்பத்தில் யாருக்காவது திடீரென உடல் நலம் குறைந்தால் இது தேவைப்படும்.

3. உடனடியாக இன்சூரன்ஸ் எடுக்க வேண்டும். Term Insurance எனப்படும் காப்புதான் உகந்தது.

பின்னர், ஒரு வருடம் கழித்து வைப்பு நிதியில் பணம் போட்ட பிறகு, அடுத்து சேமிக்கும் பணத்தை எப்படி முதலீடு செய்ய வேண்டும் என முடிவு செய்ய வேண்டும். அதற்கு தேவையான விவரங்கள்:

எதிர்கால செலவுகள் பற்றி திட்டமிடுதல்

முதலில் நமது எதிர்பார்ப்பு அல்லது ஆசைகளைப் அளவாகப் பட்டியலிட வேண்டும்.

1. ஒரு ஐந்து அல்லது பத்து வருடங்களில், பெற்றோருடைய மருத்துவ செலவுக்கு ஓரிரு லட்சம் தேவைப்படலாம். அப்போது , வைப்பு நிதியை பயன்படுத்திய பின், மறுபடி சேமித்து போட வேண்டும். தவிர, மருத்துவ செலவும் நாளுக்கு நாள் அதிகரிப்பதால், 10 வருடம் கழித்து இந்த ஒரு லட்சம் பத்தாது. 10 வருடம் கழித்து அது 2 லட்சம் என வைக்க வேண்டும்.

2. 10, 12 வருடம் கழித்து குழந்தை கல்லூரி செலவு வரும். இப்பொழுது தனியார் கல்லூரியில் பொறியாளர் ஆக, ஆண்டுக்கு 1 லட்சம் செலவு (தோராயமாக). அரசு
கல்லூரியில் படித்தால் 20,000 ஆகும். ”எப்படியாவது” நம் மகன்/மகளை பொறியாளர் ஆக்க வேண்டும். 10,12 வருடத்தில் செலவு ஆண்டுக்கு 2 லட்சம் என வைத்துக் கொள்வோம்.
அப்போது, 8 லட்சம் தேவைப்படும்.

3. மகன்/மகளின் திருமண செலவு. இது இன்னும் 20 வருடங்களில் தேவைப்படும். இப்போதைய நிலவரத்தில், நாம் 6 லட்சத்தில் நடத்தலாம், 20 வருடம் கழித்து என்றால் 18 லட்சம் ஆகலாம்.

4. 30 வருடம் கழித்து நாம் ரிடையர் ஆகும்பொழுது, பென்ஷன் பி.எஃப் தவிர கையில் பணம் இருந்தால் நல்லது. மருத்துவ செலவுக்கு ஆகும். நம் மகன்/மகளுக்கு பாரமாக இருக்க வேண்டாம். இது எவ்வளவு என்றால் குறிப்பிட்டு சொல்ல முடியவில்லை. ஒரு 20 லட்சம் இருந்தால் நல்லது.

5. நமக்குன்னு சொல்லிக்க ஒரு வீடு இருந்தால் பரவாயில்லை. இப்போது சென்னையில் வீடு விற்கும் விலையில் குறைந்த பட்சம் 40 லட்சம் ஆகும். நம் சொந்த ஊரில் 20 லட்சத்தில் நல்ல வீடு/பிளாட் கிடைக்கும். அது இன்றைய நிலவரம். இப்போது வீடு வாங்காமல், 5 வருடம் கழித்து வாங்கினால், அது 25 லட்சம் ஆகலாம்.

எண்	தேவை	ஆண்டுகள்	பணத்தின் அளவு
1.	மருத்துவ செலவுக்கு வைப்பு நிதியில் போட	10	1 லட்சம்
2.	குழந்தை கல்லூரி செலவு	12	8 லட்சம்
3.	குழந்தை திருமண செலவு	20	18 லட்சம்
4.	ரிடையர் ஆகும்பொழுது கைக்காசு	30	20 லட்சம்
5.	வீடு	5	25 லட்சம்
	மொத்தம் தேவை		72 லட்சம்

சில விஷயங்களை இப்பொழுது பார்ப்போம்.

1. இப்போதே அவருக்கு லாட்டரியில் 72 லட்சம் கிடைத்தால் அவர் தேவைகள் முடிந்து விடும். (முடியாது, ஏனென்றால் அப்பொழுது எதிர்பார்ப்பும் செலவும் அதிகரிக்கும். இருந்தாலும்....)

2. வெளியில் கடன் வாங்காமல் இப்பொழுது இருக்கும் சம்பளத்தில் அவரால் இவ்வளவு தேவைகளையும் நிறைவேற்ற முடியாது என்று 'தோன்றுகிறது'. கணக்கு போட்டு பார்த்தால்தான் உண்மை தெரியும். முடியாது என்றால் எதிர்பார்ப்பை மாற்றிக் கொள்ள வேண்டும்.

---

எதிர்கால மாத வருமானம் மற்றும் செலவு

1. நமது வருமானம் இப்படியே இருக்காது. நமக்கு மேல் பதவி சில வருடங்களில் வரலாம். நமது மனைவி வேலைக்கு போனால், செலவு 2000 அதிகரிக்கும். வருமானம் மாதம் 10000
அதிகரிக்கும். மொத்தம் நிகர வருமானம் 8000. இப்போதைக்கு மனைவி வேலைக்கு போவதில்லை என வைத்துக் கொள்வோம்.

2. நமக்கே வருடா வருடம் , வருவாய் 10% (simple interest)அதிகரிக்கும் என கணக்கிடலாம். 10 வருடங்களுக்கு பிறகு, 40,000 வரும். அதன் பின் ஒவ்வொரு வருடமும் 4000 அதிகரிக்கும் என கணக்கிடலாம்.

3. மாத செலவும் கூடவே அதிகரிக்கும். அதனால், சேமிப்பு இப்போது மாதம் 2000 என்று இருப்பது, அடுத்த வருடம் (22000 - 19000) = 3,000 என்று மாறலாம். அதற்கு அடுத்த வருடம் 3500 என்று மாறலாம்.

---

இந்த நிலையில் அவர் தேவைகளை கணக்கிடுகிட்டு விட்டார். வருமானம் மற்றும் சேமிப்பு பற்றியும் ஓரளவு தெரிகிறது.

அடுத்த பதிவில் எவ்வளவு சம்பாதித்து, சேமித்தால் இவரது தேவைகளை பூர்த்தி செய்யலாம் என்று கணக்கிடுதல்.

பரஸ்பர நிதி (வைப்பு நிதி) (Debt Mutual Funds)

(மங்களூர் சிவா, உங்கள் கேள்வி/கருத்துக்கு பதிலளிக்கும் விதமாக இப்பதிவு. இதை எழுதததூண்டியதற்கு நன்றி) .

பரஸ்பர நிதிகளில் பல வகைகள் உண்டு என்பதை முன்பு பார்த்தோம். சற்று எளிமைப் படுத்தினால்

1. பங்குகளில் முதலீடு செய்யும் பரஸ்பர நிதி. எல்லா வகைப்பங்க்குகளையும் வாங்கும் நிதிக்கு Diversified Equity Fund என்று பெயர். பங்குகள் விலை ஏறினால் இவற்றின் மதிப்பு ஏறும். இறங்கினால், இவற்றின் மதிப்பு இறங்கும்.
   
   • கடந்த மூன்று மாதங்களில் (ஜனவரி 2008 முதல் மார்ச் 2008 வரை) மார்க்கெட் சரிந்த பொழுது, இந்த வகைப் பரஸ்பர நிதிகளின் மதிப்பும் குறைந்திருக்கும்


2. வைப்பு நிதி (Fixed Deposit)இல் முதலீடு செய்யும் பரஸ்பர நிதிகள். இவை பற்றி கீழே விவரமாகப் பார்க்கலாம்


3. கலப்பு நிதிகள் (Hybrid funds or Balanced Funds). இவை கொஞ்சம் பங்குகளிலும் கொஞ்சம் வைப்பு நிதிகளிலும் முதலீடு செய்யும்.


4. துறை சார் நிதி (Sector Funds). இவை பங்குகளிலேயே குறிப்பிட்ட துறை பங்குகளை மட்டும் வாங்கும்.

வைப்பு நிதி பரஸ்பர நிதி என்றால் என்ன?

முதலில், பெரும்பாலான மக்களுக்கு இது தேவையில்லை. நீங்கள் முதலீடு செய்ய இந்நிதிகளை தேர்ந்தெடுக்க வேண்டிய அவசியம் இல்லை. ஆர்வம் இருந்தால் தொடர்ந்து படிக்கவும்.

உங்கள் பணத்தை வைப்பு நிதியில் (Fixed Deposit) போடலாம் என்றால், அதற்கு பல வங்கிகளில் போடலாம். ஒவ்வொரு வங்கியும் ஒரு வட்டி கொடுக்கும். State Bank of India ஒரு வருடத்திற்கு 8 சதவிகிதம் கொடுத்தால் இன்னொரு வங்கி 7 % கொடுக்கலாம்; மற்றும் ஒரு வங்கி 9% கொடுக்கலாம். கொஞ்சம் வேறுபாடு இருக்கலாம். இது தவிர கூட்டுறவு வங்கிகளும் வைப்பு நிதியில் 10% கூட கொடுக்கலாம். ஒரேடியாக எல்லோரும் 8% தரும் பொழுது ஒரு வங்கி 25% தராது.

இது தவிர சில கம்பெனிகளும் வைப்பு நிதிக்கு வட்டி கொடுக்கும். Cholamandala, ESSAR, (இன்னும் பல, எனக்கு மறந்து விட்டது) இவற்றிற்கு பணம் தேவைப்பட்டால், ஒன்று வங்கியிடம் சென்று கடன் கேட்கலாம். அல்லது பொதுமக்களிடம் கேட்கலாம். வங்கியில் கேட்டால் மிக அதிக வட்டிக்குதான் கடன் கிடைக்கும். அதற்கு பதில் பொதுமக்களிடம் 12% அல்லது 13% என்று கடன் வாங்கலாம்.

எல்லா கம்பெனிகளும் நினைத்தவுடன் இப்படி பொதுமக்களிடம் வாங்க முடியாது. சில விதிகளுக்கு உட்பட்டுத்தான் வாங்க வேண்டும். ஆனால் இவற்றில் வங்கிகளில் உங்களுக்கு கிடைக்கும் வட்டியை விட கொஞ்சம் அதிகம் கிடைக்கும். இல்லாவிட்டால் நீங்கள் இந்த நிறுவனங்களில் பணம் போடாமல் நேராக வங்கியில் போட்டுவிடுவீர்களே!

இந்த நிறுவனங்களில் வைக்கும் வைப்பு நிதிக்கு கொஞ்சம் பாதுகாப்பு குறைவு. அதாவது கம்பெனி திவாலானால், உங்கள் முதலுக்கு மோசம் வரலாம். ஆனால் வட்டி அதிகம்.

உங்களிடம் ஒரு கோடி ரூபாய் இருந்தால், 50 லட்சத்தை SBIஇல் 8% வட்டிக்கும், 30 லட்சத்தை கூட்டுறவு வங்கியில் 10% வட்டிக்கும், 10 லட்சத்தை ஒரு நிறுவனத்தில் 12% வட்டிக்கும், கடைசி 10 லட்சத்தை வேறு நிறுவனத்தில் 13% வட்டிக்கும் வைப்பு நிதியாக போடலாம். இதனால், மொத்த முதலும் போய் விடாது. அதேசமயம் வட்டியும் 8% விட கொஞ்சம் அதிகம் கிடைக்கும். தப்பித்தவறி ஒரு கம்பெனி திவாலானால், உங்கள் பணம் முழுதும் வராமல் , ஒரு 10% இழப்பில் கூட (10 லட்சம் என்பது வட்டியுடன் 11.2 அல்லது 11.3 லட்சம் வருவதற்கு பதில் 9 லட்சமாக வரும்) வரலாம். ஆனால், 1 கோடி பணத்தில், SBIஇல் 4 லட்சமும் (50 லட்சத்திற்கு 8% வட்டி ) , கூட்டுறவு வங்கியில் 3 லட்சமும் (30 லட்சத்திற்கு 10% வட்டி), ஒரு நிறுவனத்தில் 1.2 லட்சமும் (10 லட்சத்திற்கு 12% வட்டி) லாபமாகக் கிடைக்கும். ஒரு நிறுவனத்தில் 1லட்சம் நட்டம். மொத்தத்தில் 7.2 லட்சம் லாபம். அதாவது 7.2% வட்டி.

எண்	முதலீடு	வங்கி	வட்டி விகிதம்	வருமானம்
1.	50 லட்சம்	SBI	8%	4 லட்சம்
2.	30 லட்சம்	கூட்டுறவு	10%	3 லட்சம்
3.	10 லட்சம்	கம்பெனி 1	12%	1.2 லட்சம்
4.	10 லட்சம்	கம்பெனி 2	13%	கம்பெனி திவாலாகி 1 லட்சம் நட்டம்
மொத்தம்	1 கோடி		7.2%	7.2 லட்சம்

இதே கம்பெனி திவால் ஆகாமல் ஒழுங்காக பணத்தைக் கொடுத்தால், 1 லட்சம் நட்டத்திற்கு பதில், 1.3 லட்சம் லாபம் கூடி இருக்கும். அதாவது 9.5 % வட்டி.

நிற்க. கோடி ரூபாய் வைத்துக் கொண்டு இருப்பவர்கள் இந்த பிளாக்கை படிக்க மாட்டார்கள் என நினக்கிறேன். ஆயிரம் ரூபாயும் ஐயாயிரம் ரூபாயும் வைத்து இருப்பவர்கள் என்ன செய்வது?

இப்படி பலர் இருப்பதால், இவர்கள் பணத்தை எல்லாம் சேர்த்து பல கோடிகள் ஆன பின்னர், அவற்றை வட்டிக்கு விடலாம். இதுதான் debt fund எனப்படும் “வைப்பு நிதி பரஸ்பர நிதி”.

இதற்கும் மார்க்கெட்டுக்கும் நேரடியாக சம்பந்தம் இல்லை. மார்கெட் விழுந்தாலும் மேலே பறந்தாலும் கவலை இல்லை. ஆனால், வங்கியில் வட்டி விகிதம் மாறினால், இவற்றின் மதிப்பு மாறும். ஏனென்றால் வங்கி வைப்பு நிதி (மற்றும் நிறுவன வைப்பு நிதி )தான் இதற்கு underlying asset (அடிப்படை சொத்து?)

வங்கியின் வட்டி விகிதம் திடீரென அதிகரித்தால் இதன் மதிப்பு கொஞ்ச காலம் சிறிதளவு குறையும். நான் தவறாக எழுதவில்லை. வட்டி விகிதம் அதிகரித்தால் இதன் மதிப்பு சிறிதளவு குறையும், அதிகரிக்காது. இதற்கு காரணம் என்ன?

நீங்கள் 100 ரூபாயை வங்கியில் ஒரு வருட வைப்பு நிதியாக ஜனவரி 1ல் (2008இல்) போட்டால், உங்களிடம் ஒரு பத்திரத்தில் ஜனவரி 1, 2009ல் 110 ரூபாய் தருவதாக எழுதிக் கொடுப்பார்கள். அதே நாள் இன்னொருவர் சென்று 100 ரூபாய் போட்டாலும் அவருக்கும் ஜனவரி 1, 2009ல் 110 ரூபாய் கொடுப்பதாக எழுதித் தருவார்கள். அதாவது 10 சதவிகித வட்டி.

மறுநாள் திடீரென்று வட்டி 5 சதவிகிதம் என்று குறைவதாக கற்பனை செய்யவும். (நடைமுறையில் ஒரேடியாக குறையாது. கணக்கு சுலபமாக இருக்க இப்படி கற்பனை செய்வோம்). அப்போது உங்கள் கையில் இருக்கும் பத்திரத்தின் மதிப்பு என்ன தெரியுமா?

5% வட்டியில் ஜனவரி 1, 2009ல் 110 ரூபாய் வேண்டும் என்றால், நீங்கள் 104.75 ரூபாய் போட வேண்டும். அப்போதுதான் 5% வட்டியில் 110 ரூபாயாக ஒரு வருடத்தில் மாறும். 100 ரூபாய் போட்டால் அது 105 ரூபாயாக மாறும். அதனால், வட்டி விகிதம் குறைந்ததால், உங்கள் பத்திரத்தின் மதிப்பு ஏறக்குறைய 4.75 % கூடிவிட்டது.

இதே வட்டி குறையாமல் கூடி இருந்தால்? 10% பதில் 20% என மாறிவிட்டால், உங்கள் மையில் இருக்கும் பத்திரத்தின் மதிப்பு 91.67 ரூபாய்தான்? ஏனென்றால் 91.67 ரூபாய் போட்டால், ஒரு வருடத்தில், 20% வட்டியில் அது 110 ரூபாய் ஆகிவிடும்.

இப்போது,

1. உங்கள் முதல் முற்றிலும் முழுகவில்லை என்பதை கவனிக்கவும். 100 ரூபாய் என்பது கொஞ்சம் மதிப்பு குறையலாம் அல்லது கூடலாம். ஆனால் திவால் ஆகாது.



2. வட்டி விகிதம் இப்படி எல்லாம் எகிறவோ இறங்கவோ செய்யாது. கால் விகிதம் மாறவே மாதக்கணக்காக ஆகலாம். அதனால் உங்கள் இழப்பு அல்லது லாபம் அவ்வளவாக மாறாது. நான்
   சும்மா கணக்கு சுலபமாக இருக்க இப்படி பெரிய மாற்றங்களைக் கற்பனை செய்து கொள்ள சொன்னேன்.



3. இந்த பரஸ்பர நிதிகளை திவாலாகும் கம்பெனிகளில் வட்டிக்கு விட மாட்டார்கள். அதனால் முதலுக்கு மோசம் வரும் வாய்ப்பு மிக மிகக் குறைவு.

சரி, இவ்வளவு சித்திரவதை ஏன்? பேசாமல் வங்கியில் வைப்பு நிதி வைத்து விட்டு போகவேண்டியதுதானே?

அதுதான் பெரும்பாலானவர்களுக்கு சரி. சில சமயங்களில் சிலருக்கு இதில் நன்மை உண்டு.

1. உங்கள் வைப்பு நிதி வட்டிக்கு வரி பிடிப்பார்கள். இந்த பரஸ்பர நிதியில், நீங்கள் இவற்றை விற்கும் போது மட்டுமே வரி கட்ட வேண்டும். அதுவும் நீங்கள் கட்ட வேண்டும். அவர்கள் பிடிக்க மாட்டார்கள்.

அதனால், 3 வருடம் விற்காமல் இருந்தால், அதுவரை வரி கட்ட வேண்டியதில்லை. வருடா வருடம் அவர்கள் பணம் பிடிப்பதும், நாம் மேலே கட்டுவது அல்லது திரும்பக் கேட்பது என்ற தொல்லை இல்லை.

2. ஒரு வருடத்திற்குள் விற்றால் முழு வரி கட்ட வேண்டும். ஒரு வருடம் கழித்து விற்றால், வரி குறைவு. இதற்கு முன் 10% என இருந்தது, இப்போது ப.சிதம்பரம் 15% என மாற்றி இருக்கிறார் என கேள்வி. (இதை சரி பார்க்க வேண்டும். சுட்டிக் காட்டிய மங்களூர் சிவாவிற்கு நன்றி).

3. ஒவ்வொரு வருடமும் வைப்பு நிதியை renew செய்ய வேண்டும். இதில் அந்தக் கவலை கிடையாது.

4. வைப்பு நிதியை ஒரு வருடத்திற்கு என நினைத்து போடுகிறீர்கள். ஏதோ அவசரத்திற்கு அதை 3 மாதங்களில் எடுத்தால், குறைந்த வட்டி விகிதத்தில் கிடைக்கும். பரஸ்பர நிதியில் அப்படி இல்லை. தினமும் சிலர் பணம் போடுவார்கள், சிலர் பணம் எடுப்பார்கள். அதனால் ஒவ்வொரு நாளும் சில வைப்பு நிதிக் கணக்கு துவங்கப்படும், சில வைப்பு நிதிகள் (mature ஆனவை) முடிக்கப்படும். முடிக்கப்பட்ட நிதியில் இருந்து பணத்தை எடுத்து உங்களுக்கு கொடுத்து விடுவார்கள். எல்லோருக்கும் ஓரளவு நல்ல வட்டி வரும்.

ஆனால், பெரும்பாலான மக்களுக்கு இதனால் பெரிய லாபம் இல்லை என்பதால், நான் இதை வலியுறுத்தவில்லை.
பின் குறிப்பு
இதிலேயே short-term, long-term , very short term (liquid) என்றெல்லாம் பிரிவுகள் உண்டு. இவை இன்னும் நுணுக்கமான வித்தியாசங்கள் கொண்டவை. கடைசியில் வருவாயை பார்த்தால் பெரிய வித்தியாசம் இருக்காது. பல கோடி ரூபாயை fixed deposit இல் போட விரும்புவர்கள்தான் அந்த நுணுக்கங்களைத் தெரிந்து கொள்ள வேண்டும். நமக்கு தேவையில்லை.

பரஸ்பர நிதி - கேள்வி பதில் 2 (Mutual Funds. Q&A part 2)

4. பங்கு வாங்கினால் சில சமயம் டிவிடென்ட் தருகிறார்கள். பரஸ்பர நிதியிலும் சில சமயம் டிவிடெண்ட் தருகிறார்கள். இரண்டுமே நமக்கு வருவாய்தானே?

5. பரஸ்பர நிதியில் growth மற்றும் dividend என்று இரண்டு வித choice இருக்கின்றன. எந்த சமயத்தில் எது வாங்க வேண்டும்?

இரண்டுக்கும் சேர்த்து சற்று விரிவான பதில்.

பங்கு வைத்திருப்பவர்களுக்கு டிவிடெண்ட் தருவதற்கும், பரஸ்பர நிதியில் டிவிடெண்ட தருவதற்கும் நிறைய வித்தியாசம் இருக்கிறது.

இதற்கு முன்பே, பங்கு வாங்குவது தேவையற்றது, நல்லதல்ல என்ற எனது கருத்தை, காரணங்களுடன் கூறி இருக்கிறேன். எப்படியோ, உங்களிடம் Infosys போன்ற நிறுவனங்களின் பங்கு (share or equity) இருந்தால், சில சமயங்களில் அந்த நிறுவனம் டிவிடெண்ட் என்று கொஞ்சம் பணத்தை அனுப்பும். அது லாபத்தில் கொஞ்சம் பகுதியை உங்களுடன் பகிர்வது போல. இதனால் பங்கின் விலை ஏறவோ இறங்கவோ செய்யாது.

ஆனால், பரஸ்பர நிதியில் டிவிடெண்ட் என்பது, உங்கள் பணத்தையே உங்களுக்கு திருப்பித் தருவதாகும். உதாரணமாக, நீங்கள் பரஸ்பர நிதிக்கு பதில் தங்கத்தில் முதலீடு செய்வதாக கற்பனை செய்து கொள்ளவும். பத்து வருடங்களுக்கு முன் 1998ல் 10,000 ரூபாய்க்கு தங்கம் வாங்கி இருக்கிறீர்கள். இப்போது அந்த தங்கத்தின் மதிப்பு 20,000 ரூபாய். இதில் 5000 ரூபாய் மதிப்புள்ள தங்கத்தை விற்றுவிட்டால், உங்களிடம் கையில் 5000 ரூபாய் பணமாகவும் (cash) மீதி 15000 ரூபாய் தங்கமாகவும் இருக்கும்.

அதைப்போலவே, பரஸ்பர நிதியில் உங்கள் முதலீடு 10000 ரூபாய் என்று வைத்துக் கொள்வோம். இப்போது அவர்கள் உங்களுக்கு 2000 ரூபாய் டிவிடெண்ட் கொடுத்தால், உங்கள் பரஸ்பர நிதியின் மதிப்பு 8000 ரூபாயாகக் குறைந்துவிடும். இப்பொழுது 8000 ரூபாய்க்கு பரஸ்பர நிதியும், 2000 ரூபாய் பணமாகவும் (cash) இருக்கும்.

பலரும் இதை உடனடியாக உணர்வது இல்லை. டிவிடெண்ட் கொடுத்த பின், பரஸ்பர நிதியின் மதிப்பு குறையும். உதாரணமாக, NAV (net asset value) என்பது டிவிடெண்டுக்கு முன் 15 ரூபாய் என்று இருந்தால், 2 ரூபாய் டிவிடெண்ட் கொடுத்த பிறகு 13 ரூபாய் ஆகிவிடும். உங்களிடம் இருக்கும் யூனிட்டின் எண்ணிக்கை மாறாது. நீங்கள் அதை மட்டும் பார்த்தால், ”டிவிடெண்ட் வந்து விட்டது, அதே அளவு யூனிட்டும் இருக்கு” என்று மகிழ்வார்கள்.

உங்கள் பணத்தில் ஒரு பகுதியை, உங்களுக்கு திருப்பி கொடுப்பதில் என்ன பயன்? வேண்டும் என்றால் நீங்களே உங்கள் முதலீட்டில் ஒரு பகுதியை விற்று காசாக்கலாமே? எதற்கு இந்த டிவிடெண்ட்?

இது சரியான கேள்வி. பெரும்பாலானவர்களுக்கு, பெரும்பாலான் சமயங்களில் இந்த டிவிடெண்டால் எந்தப் பயனும் இல்லை. அதனால்தான், நீங்கள் வாங்கும் பரஸ்பர நிதி growth option எனப்படும் டிவிடெண்ட் இல்லாத முறையிலேயே வாங்கவேண்டும்.

எந்த சமயத்தில் யாருக்கு இந்த பரஸ்பர நிதி டிவிடெண்டினால் பயன்?
பங்கின் மூலம் வந்தாலும், பரஸ்பர நிதிமூலம் வந்தாலும் உங்களுக்கு வரும் டிவிடெண்ட் சட்டப்படி வரிவிலக்கு பெற்றது.

நீங்கள் பரஸ்பர நிதியை வாங்கி ஒரு வருடத்திற்குள் விற்றால், அதில் வரும் லாபத்திற்கு 10 % வரி கட்ட வேண்டும். ஒரு வருடத்திற்கு மேல் விற்றால், முழு வரி விலக்கு. ஆனால், நீங்கள் நிதி வாங்கி 6 மாதத்தில் டிவிடென்ட் வந்தால் அதற்கு வரி விலக்கு. இந்த நிலையில் டிவிடெண்ட் option எடுத்து இருப்பவர் வரி கட்ட மாட்டார். அதே சமயம், 6 மாதத்தில் பரஸ்பர நிதியை விற்பவர் வரி கட்ட வேண்டும்.

பலரும் வரி கட்டாததால், நடைமுறையில் இந்த வித்தியாசம் கூட இருப்பதில்லை.

எனது கருத்துப்படி பரஸ்பர நிதியை மூன்று வருடங்களுக்கு மேல் வைத்திருக்கும் எண்ணம் இருந்தால், முழு வரிவிலக்கை எப்படியும் அனுபவிப்பீர்கள். அதனால் டிவிடெண்டால் பயனில்லை.

இன்னமும் சில நுணுக்கமான subtle விவரங்கள் உண்டு. ஆனால் அவை அவ்வளவு முக்கியம் இல்லை. கடைசியில் உங்கள் வருவாயை அவை அதிகம் பாதிக்காது. அதனால் அவற்றை சொல்லி உங்களை குழப்பாமல் விட்டு விடுகிறேன் :-)

எந்தப் பரஸ்பர நிதிகளை வாங்கலாம்?

பரஸ்பர நிதிகளை வாங்குவதற்கு முன், நமது தேவைகளையும், மாத வருமானத்தைப் பற்றியும் சிந்தித்து பின்னர் ‘ஒவ்வொரு மாதமும் என்னால் சுமார் 1000 ரூபாய் முதலீடு செய்ய முடியும். அதை நான் அடுத்த 3 வருடங்களுக்கு, அல்லது 5 வருடங்களுக்கு தொடமாட்டேன்” என்று முடிவு செய்து கொள்ள வேண்டும். அப்படிப் பட்ட பணத்தை மட்டும் பரஸ்பர நிதியில் போடலாம்.

“நடு நடுவில் நான் வாங்கிய பரஸ்பர நிதியின் மதிப்பு கூடவோ குறையவோ செய்யலாம். பயந்து அல்லது அவசரப் பட்டு விற்று விடக் கூடாது” என்ற சுயக் கட்டுப்பாட்டையும் வலியுறுத்திக் கொள்ள வேண்டும். இதற்கு நல்ல வழி என்ன என்றால், முதலீடு செய்த பின்னர் சில வருடங்களுக்கு அதன் மதிப்பைப் பற்றியே பார்க்கக்கூடாது. தினமும் பார்த்துக் கொண்டு இருந்தால், கை அரிக்கும்.

இத்தனைக்கும் தயாராக இருந்தால்...................

1. SBI Magnum Contra-Growth
2. Kothak 30-Growth
3. DSP- TIGER-Regular-Growth
4. Kothak Opportunities-Growth
5. Franklin India Prima Plus-Growth
6. Franklin India Index BSE Sensex - Growth
7. HDFC Top 200 -Growth
8. HDFC Growth - Growth
9. HDFC Equity - Growth

இவை எல்லாவற்றையும் வாங்க வேண்டாம். ஒன்று அல்லது இரண்டு வாங்கினால் போதும். மீண்டும் மீண்டும் (மாதாமாதம் அல்லது 3 மாதங்களுக்கு ஒரு முறை) வாங்கும் பொழுது, முன்பு வாங்கிய நிதியிலேயே வாங்க வேண்டும்.

இந்த லிஸ்ட் எப்படி வந்தது? www.valueresearchonline.com என்ற வலைப்பதிவில், இந்திய பரஸ்பர நிதிகள் பற்றி நல்ல புள்ளி விவரங்கள் இருக்கின்றன. அதிலிருந்து ‘பரவலான பங்குகளை வாங்கும் பரஸ்பர நிதி' (Diversified Equity Mutual Funds) என்ற வகை பரஸ்பர நிதிகளை பார்க்கலாம். அவற்றில், பெரிய நிறுவனங்களில் (Large Cap) முதலீடு செய்யும் பரஸ்பர நிதிகளை இங்கு கொடுத்து இருக்கிறேன். இவைதான் பெரும்பாலான மக்களுக்கு உகந்த பரஸ்பர நிதிகள்.

சில நல்ல நிதிகள் விட்டுப் போய் இருக்கலாம். அது வேண்டுமென்று இல்லை. ஆனால் மேலே இருக்கும் லிஸ்டில் இருப்பவைகளில் ஏதாவது ஒன்று அல்லது இரண்டு நிதிகளில் பணம் போட்டால் போதும். எல்லாவற்றிலும் கொஞ்சம் கொஞ்சம் போடுவதில் புண்ணியம் இல்லை. உங்களுக்கு எல்லாக் கணக்கையும் கூட்டிக் கழித்து தலைவலிதான் மிஞ்சும். மாதம் 20,000 வரை பணம் போடும் அளவு வசதி இருந்தால் 3 நிதிகளில் போடலாம். நம்மில் பெரும்பாலானவர்களுக்கு மாதம் 10,000 போடுவதே சிரமம். (இந்தப் பணத்தை 3 வருடங்களுக்கு தொடக்கூடாது என்பதை மறுபடி நினைவு படுத்திக் கொள்ளவும்.) அதற்கு ஒன்று அல்லது இரண்டு நிதிகள் தான் சரி.

எந்த நிறுவனம் நல்ல நிறுவனம்?

ஏறக்குறைய எல்லா நிறுவனஙகளுமே நல்ல நிறுவனங்கள்தான். ஏதாவது முன்பின் தெரியாத கம்பெனி புதிதாக வந்தால்தான் நாம் யோசிக்க வேண்டும். SBI, Franklin Templeton, Fidelity, Reliance, HDFC, HSBC, ICICI ஆகிய எல்லாமே நம்பிக்கையானவைதான்.

ஆனால் ஒவ்வொன்றிலும் நல்ல நிதிகளும் இருக்கின்றன. ‘லாயக்கில்லாத' நிதிகளும் இருக்கின்றன. நாம்தான் பார்த்து வாங்க வேண்டும். அதனால்தான், இதற்கு முன் பாகத்தில் ஒரு லிஸ்ட் கொடுத்து இருக்கிறேன்.

டிஸ்கி. எனக்கு நீங்கள் இந்த பரஸ்பர நிதிகளை வாங்குவதாலோ (அல்லது எதை வாங்கினாலும்), ஒரு பைசா வராது. எனவே, ‘இவனும் சுய நலத்தோடு எழுதுகிறானோ' என்ற கவலை வேண்டாம். நான் தனிவாழ்க்கையில் பெரும்பாலும் சுய நலத்தோடு நடந்து கொண்டாலும், பதிவுகளில் எழுதும்பொழுது அதை முன்னிறுத்தி எழுதவில்லை.

பரஸ்பர நிதி - கேள்வி பதில் 1 (Mutual Funds. Q&A part 1)

1. ”எனக்கு தெரிந்து பலர் பங்கு சந்தையில் பணம் பார்த்திருக்கிறார்களே, நானே போன வருடம் பத்தாயிரத்தை பதினைந்தாக மாற்றினேனே, நீ ஏன் நேரடியாக பங்கு (stock)அல்லது துறைசார் பரஸ்பர நிதி வாங்க வேண்டாம் என்கிறாய்?”

பதில்: சில சமயங்களில் நீங்கள் நல்ல லாபம் கண்டிருக்கலாம். ஆனால் பல வருடங்களுக்கு அது தொடர வாய்ப்பு மிகக் குறைவு. நீங்கள் உங்கள் லாபத்தை, பங்கு-பரஸ்பர நிதியின் லாபத்துடன் பல ஆண்டுகள் compare செய்து பார்த்தால், நம்மில் ஏறக்குறைய அனைவருக்குமே லாபம் குறைவாகத்தான் வரும். ஒருவருக்கு ஓரிரு வருடங்களில் வந்த லாபத்தை வைத்து முடிவெடுக்கக் கூடாது.

நீங்கள் ஒரு ‘கிக்'கிற்காக கொஞ்சம் பணத்தை எடுத்து பங்கில் (Stock) இல் போடுங்கள், தவறில்லை. அதை முதலீடு என்று நினைக்க வேண்டாம். எடுத்துக்காட்டாக, அமெரிக்காவில் பலரும், Los Vegas என்ற கேளிக்கை நகருக்கு சென்று கொஞ்சம் பணத்தை செலவிடுவார்கள். அதில் சூதாட்டம் (gambling machine) உண்டு. அதில் பணம் போட்டால் சில சமயம் கொஞ்சம் (அல்லது நிறைய்) பணம் கிடைக்கும். பெரும்பாலும் இழப்புதான் இருக்கும். பலரும் வருடத்தில் ஒரு நாள் இங்கு வந்து சுற்றிப்பார்த்து ரிலாக்ஸ் செய்து, சூதாட்டத்தில் விளையாடி,பல மணி நேரங்களில் 200 டாலர் அல்லது 500 டாலர் இழந்து அல்லது அதிசயமாக 200 டாலர் சம்பாதித்து வருவார்கள்.

இதைக் குறை சொல்லவில்லை. ஆனால் அது சம்பாதிக்கும் வழி என்று நினைத்தால்தான் பிரச்சனை. நீங்கள், ‘போனால் போகட்டும்' என்று ஒரு தொகையை எடுத்து, பங்கு வாங்கலாம். அது மேலே போனால் ஜாலி, கீழே போனால் பரவாயில்லை. உங்களுக்கு தேவை, அதை தினமும் பார்த்து 'கிக்' ஏற்படுவது. இந்த நோக்கில் பங்கு வாங்குவதோ அல்லது துறைசார் பரஸ்பர நிதி வாங்குவதோ தவறில்லை.

அதே சமயம் சூதாட்டத்தில் அளவுக்கு மீறி பணம் கட்டாமல் பார்த்துக்கொள்ள வேண்டும். அதைப்போலவே பங்கிலோ அல்லது துறைசார் பரஸ்பர நிதியிலோ ஆர்வக்கோளாறில் அதிகம் பணம் போடக்கூடாது.

இந்த வம்பே வேண்டாம் என்றால் லாஸ் வேகாஸ் பக்கமே போகக்கூடாது. அதாவது பங்கு அல்லது துறை சார் பரஸ்பர நிதி வாங்கவே கூடாது.

2. இதில் ஏன் ULIP, NFO பற்றி எழுதவில்லை?
ULIP என்பது நமது காப்பு நிதியில் (insurance) ஒரு பகுதியில் பரஸ்பர நிதி வாங்குவது. உங்களுக்கு தேவை காப்பு நிதி என்றால் அதைத் தனியாக வாங்குங்கள். பரஸ்பர நிதி என்றால் அதைத் தனியாக வாங்குங்கள். நீங்கள் தனியாக வாங்கினால், உங்களுக்கு தேவையான பரஸ்பர நிதியை வாங்கலாம். ULIP வாங்கினால், அவர்கள் இஷ்டத்திற்கு வாங்குவார்கள். அவர்கள் இஷ்டத்திற்கு மாற்றுவர்கள். அதில் இருக்கும் கமிஷனின் அளவு அதிகம்.

இது தவிர இந்த ULIP மாதிரி திட்டங்களில், “அடுத்த 20 வருடங்களுக்கு நான் ஒவ்வொரு ஆண்டும் 20 ஆயிரம் ரூபாய் கட்டுவேன்” என்பது போல கையொப்பம் இடவேண்டி இருக்கும். உங்கள் வேலை மாறலாம், திடீர் என்று செலவு வரலாம். அப்போது கூட இந்த 20 ஆயிரத்தை கட்ட வேண்டும். இல்லாவிட்டால் நிறைய இழப்பு.

ஆனால், நீங்களாக பரஸ்பர நிதி வாங்கினால், உங்களிடம் காசு இருந்தால் வாங்குவீர்கள். திடீரென்று தவிர்க்க இயலாத செலவு வந்தால் அந்த வருடம் பரஸ்பர நிதி வாங்க மாட்டீர்கள். இதனால் இழப்பு இல்லை. தேவையில்லாமல் அதிககாலத்திற்கு நாம் பணம் கட்டும் உடன்படிக்கையில் கையொப்பம் இடக்கூடாது.

NFO என்பது, புதிய பரஸ்பர நிதி. அதற்கும் பழைய பரஸ்பர நிதிக்கும் எந்த வேறுபாடும் கிடையாது. பழைய பரஸ்பர நிதியில் அது எப்படி returns தரும் என்பதை நாம் அறியலாம். புதிய நிதியில் அது கூடக் கிடையாது.

NFO 10 ரூபாய் என்றால் அது cheap என்று தவறான எண்ணம் பலருக்கும் இருக்கிறது. இது உண்மை அல்ல. நீங்கள் 10 ரூபாய்க்கு வாங்கும் பங்கு ஒரு வருடம் கழித்து 15 ரூபாய் என்று மாறுவதாக வைத்துக் கொள்வோம். அதே போன்ற பழைய பரஸ்பர நிதி, முதலில் 120 ரூபாய் என்று இருந்தால், அது ஒரு வருடத்தில் 180 ரூபாய் ஆகி இருக்கும். எனவே, வருமானம் இரண்டிலும் 50%. பரஸ்பர நிதியில் அதன் தற்போதைய மதிப்பை வைத்து எடைபோடக் கூடாது. அது பங்கு போன்றது அல்ல.

3. பரஸ்பர நிதியில் 10 ரூபாய்க்கு வரும் புது நிதி (New Fund Offer அல்லது NFO) குறைந்ததுதானே? அதைவிட்டு ஏன் அதிக விலை இருக்கும் பழைய நிதிதான் வாங்க வேண்டும் என்று சொல்கிறாய்?

பரஸ்பர நிதியின் விலை என்பது நாம் வாங்கும் பொருளின் விலை போல இல்லை. இதற்கு ஒரு எடுத்துக்காட்டு மூலம் விளக்கலாம். இங்கு பங்குகளில் முதலீடு செய்யும் பரஸ்பர நிதிகளை குறிப்பாக பார்ப்போம். ஒரு பரஸ்பர நிதி எந்த பங்குகளில் முதலீடு செய்கிறது என்பதைப் பொறுத்துதான் அது வளர்வதும், தேய்வதும் இருக்கும்.

நாம் சாதாரணமாக தங்கம் வாங்கினால் அதை அரை பவுன், ஒரு பவுன் என்று எடையில் வாங்கலாம். ஒரு பவுன் என்பது 8 கிராம். வெள்ளி என்பதை கட்டியாக வாங்கினால் 100 கிராம் என்று வாங்கலாம் என்று நினைக்கிறேன். தங்கத்தின் தற்போதைய விலை ஒரு கிராம் சுமார் 1000 ரூபாய். வெள்ளியின் தற்போதைய விலை ஒரு கிலோ சுமார் 30,000 ரூபாய்.
தங்கத்தின் விலை பத்து வருடங்களுக்கு முன் 1998இல் சுமார் கிராம் ஒன்றுக்கு 500 ரூபாய் என்றும் வெள்ளி விலை கிலோவிற்கு 10,000 ரூபாய் என்றும் ஒரு பேச்சுக்கு வைத்துக் கொள்ளவும். தாமிரத்தின் விலை 1998ல் கிலோ 100 ரூபாய் என்றும் 2008இல் விலை குறைந்து கிலோ 50 ரூபாய்க்கு விற்கிறது என்றும் கற்பனை செய்து கொள்ளவும். (கணக்கு சுலபமாக இருக்க விலையை கொஞ்சம் கூட்டி குறைத்து கொள்கிறேன். எங்கே தங்கம் கிராமுக்கு 1000 ரூபாயில் கிடைக்கிறது என்று கேட்க வேண்டாம்! தாமிரமோ அல்லது வேறு உலோகமோ விலை குறையவில்லை)

விலை	1998	2008
தங்கம் கிராம் ஒன்றிற்கு	500	1000
வெள்ளி கிலோவிற்கு	10000	30000
தாமிரம் கிலோவிற்கு	100	50 (விலை குறைந்து இருக்கிறது)

நீங்கள் கடையில் சென்று தங்கக் காசு வாங்க வேண்டும் என்றால் அதை அரை பவுன் அல்லது ஒரு பவுனாகத்தான் வாங்க முடியும் . இப்போது அரை பவுன் தங்கக் காசு வேண்டும் என்றால் 4 கிராம் = 4 * 1200 = 4800 ரூபாய் கொடுக்க வேண்டும். அதற்கு பதிலாக, ஆயிரம் ரூபாய்க்கு தங்கக் காசை வெட்டிக் கொடு என்று கேட்டால், கொடுக்க மாட்டார்கள்.

ஆனால் நகைகள் ஒரு பவுன், அல்லது அரை பவுன் என்று இல்லாமல் வேறு அளவிலும் கிடைக்கும். (அதில் சேதாரம், செய்கூலி, கல் விலை என்று தீட்டி விடுவார்கள். ஆனால் இப்போதைய உதாரணத்தில் அவை எல்லாம் இல்லை என்று கற்பனை செய்து கொள்ளவும்).

நீங்கள் 1998இல் ஆயிரம் ரூபாய் கொடுத்து ஒரு நகை (தோடு) வாங்கி இருந்தால், அதில் 2 கிராம் தங்கம் இருக்கும். அதன் மதிப்பு இப்போது 2 * 1000 = 2000 ரூபாய்.
இப்போது கடைக்கு போனாலும் ஆயிரம் ரூபாய்க்கு தோடு கிடைக்கும். ஆனால், அதன் எடை 1 கிராம் தான் இருக்கும்.

தங்கம் விலை அடுத்த ஆண்டில் ஏறலாம் அல்லது இறங்கலாம். 10% ஏறும் என்று நாம் எதிர்பார்ப்போம். அப்போது பழைய தோடின் மதிப்பு 2200 ரூபாய் ஆகும். புதிய தோடின் மதிப்பு 1100 ரூபாய் ஆகும்.

பழைய தோடு நல்ல முதலீடா, புதிய தோடு நல்ல முதலீடா என்று கேட்டால் இரண்டும் சரி சமம் என்று தான் சொல்ல வேண்டி இருக்கும். இப்போதைய தோடு மலிவாகக் கிடைப்பதாகச் சொல்லலாமா? கூடாது. இதன் எடையும் குறைவு, அதனால் விலை குறைவும். புதிய தோடின் விலை 10% ஏறினால், பழைய தோடின் விலையும் 10% ஏறும். இவை இரண்டுமே தங்கத்தின் விலையைப் பொறுத்தது. இதை ஆங்கிலத்தில் underlying asset என்று சொல்வார்கள். தங்கத்தின் விலை இறங்கினால், இரண்டு தோடுகளின் மதிப்பும் இறங்கும்.

இதே 1998இல் 10 கிலோ தாமிரம் வாங்க 10 * 100 = 1000 ரூபாய் தேவை. அப்படி வாங்கி இருந்தால் அதன் மதிப்பு இப்பொழுது 500 ரூபாய் ஆகும். நீங்கள் இப்போது தாமிரக் கம்பி ஆயிரம் ரூபாய்க்கு வாங்கினால் 20 கிலோ கிடைக்கும். பழைய தாமிரக் கம்பி 500 ரூபாய் என்றால் அது மலிவு இல்லை. புதிய தாமிரக் கம்பி 1000 ரூபாய் என்றால் அது அதிக விலை இல்லை. இரண்டுக்கும் அடிப்படை பொருள் தாமிரமே.

இன்னும் சொல்லப்போனால், பழைய தாமிரம் விலை குறைவதால் அதை மலிவு என நினைத்து நாம் வாங்க மாட்டோம். மேலும் விலை குறையுமோ என பயந்து இனிமேல் தாமிரத்தில் முதலீடு செய்யக் கூடாது என்றுதான் நினைப்போம்.

பரஸ்பர நிதி என்பது நகை வாங்குவது போன்றது. தங்கக் காசு போல அரை பவுன் அல்லது ஒருபவுன் என்று வாங்கப் படுவதில்லை. ஆயிரம் ரூபாய்க்கு தோடு, 5000 ரூபாய்க்கு வளையல் என்று வாங்குவது போன்றது.

நீங்கள் 1998இல் உங்கள் காசை தங்கத்தில் முதலீடு செய்திருந்தால் இப்போது இரண்டு மடங்காக இருக்கும். வெள்ளியில் முதலீடு செய்திருந்தால் மூன்று மடங்காகி இருக்கும். தாமிரத்தில் செய்திருந்தால் பாதி இழப்பு இருக்கும்.

இந்த விவரங்களை வைத்து இப்போது நீங்கள் முதலீடு செய்ய வேண்டும் என்றால் எதில் செய்வீர்கள்? வெள்ளியில் செய்ய நினைப்போம். எல்லா பரஸ்பர நிதியிலும், “Past performance is not an indicator of future performance" “முன்பு விலை கூடியதால் இப்போதும் கூடும் என்று சொல்ல முடியாது” என்று எழுதி இருப்பார்கள். அது உண்மையே. ஆனால், முன்பே இழப்பான முதலீட்டில் நாம் மேலும் முதலீடு செய்ய மாட்டோம்.

இப்போது உங்களிடம் ஒருவர் வந்து ‘1000 ரூபாய் கொடுங்கள், நான் வேறு உலோகத்தில் உங்களுக்கு முதலீடு செய்கிறேன்” என்று சொன்னால் கொடுக்க மாட்டீர்கள். உங்களுக்கு தெரிந்து தங்கமும் வெள்ளியும் லாபத்திலும், தாமிரம் நட்டத்திலும் இயங்குகின்றன. இதை விட்டு, முன்பின் விலை விவரம் தெரியாத வேறு உலோகத்தில் ஏன் முதலீடு செய்ய வேண்டும்.

அவர் ”புதிய உலோகம் ஒவ்வொரு கிலோவும் 200 ரூபாய்தான், உங்களுக்கு 5 கிலோ வாங்கித் தருகிறேன் ” என்று சொன்னால் ஏற்றுக்கொள்வோமா? அதை மலிவு என்று நினைப்போமா? புதிய உலோகம் என்ன என்று தெரியாமல் முடிவுக்கு வர முடியாது. கூடாது. புதிய உலோகம் அலுமினியமாக இருக்கலாம். அது விலை கூடுமா குறையுமா என்று நமக்கு தெரியாது. அதற்கு பதில் தங்கத்திலோ வெள்ளியிலோ முதலீடு செய்யலாமே? “தங்கம் கிராம் 1000 ரூபாய், புதிய் உலோகம் தான் மலிவு” என்று யாரும் நினைப்பதில்லை.

அதைப்போலவே, பரஸ்பர நிதியின் (தோடின், அல்லது கம்பியின்) மதிப்பு, அதில் இருக்கும் அடிப்படை பங்குகளை (தங்கமா அல்லது தாமிரமா என்பதைப்) பொறுத்தது. பழைய பரஸ்பர நிதிகள் பற்றி நமக்கு தெரியும். இப்பொழுதும் தங்கம் விலை ஏறுமா அல்லது இறங்குமா என்று நிச்சயமாக சொல்ல முடியாது. ஆனால்,தங்கத்தையும் வெள்ளியையும் தாமிரத்தையும் ஒப்பிட்டு, தங்கத்திலோ வெள்ளியிலோ முதலீடு செய்வோம்.

ஒரு சிலர், தாமிரம் ஏற்கனவே மிகவும் இறங்கி விட்டது, இனி கீழே போகாது, மேலேதான் போகும் என்று முடிவு செய்து முதலீடு செய்யலாம். அதில் கூட ஒரு லாஜிக் இருக்கிறது. ஆனால், தெரியாத “புதிய உலோகத்தில்” முதலீடு செய்வது சூதாட்டம்தான். புதிய பரஸ்பர நிதியில் முதலீடு செய்வது, ‘புதிய உலோகம் கிலோ 200 ரூபாய்தானாம், ஆயிரம் ரூபாய் கொடுத்து ஒரு கிராம் தங்கம் வாங்குவதை விட 5 கிலோ புதிய உலோகம் வாங்கலாம்” என்று சொல்வதைப் போல. (இதே வார்த்தைகளை “ஆயிரம் ரூபாய் கொடுத்தால், NFOஇல் 100 யூனிட் கிடைக்கும், பழைய பரஸ்பர நிதியில் 15 யூனிட்தான் கிடைக்கும். NFO தான் better” என்று, என் கூட வேலை செய்பவர் என்னிடம் வாதாடி இருக்கிறார்)

பிறகு எதற்கு இவ்வளவு NFO? மக்களே, புதிய பரஸ்பர நிதி விற்பதில் ஏஜண்டுகளுக்கு அதிக கமிஷன் உண்டு. அதில் initial expense என்று கூறி பணம் பறிக்க வழி உண்டு. பழைய பரஸ்பர நிதியை விற்பதில் கமிஷன் குறைவு. இப்போது SEBI, நீங்கள் நேரடியாக பரஸ்பர நிதியை வாங்கினால் கமிஷனே கூடாது என்று வேறு உத்தரவு போட்டு விட்டது. நீங்கள் புதிய பரஸ்பர நிதியை (NFO) வாங்க வேண்டும் என்று ஏஜண்டுகள் சொல்ல அவர்களின் சுய நலமும், உங்கள் நலம் பற்றிய அக்கறைஇன்மையுமே காரணம். அவர்கள் சுயனலமாக இருப்பது தவறில்லை. அதற்காக நம் நலனை தியாகம் செய்வதுதான் தவறு.

இத்தனை நாள் நமது அறியாமையைப் பயன்படுத்தி middleman எனப்படும் நடுத்தரகர்கள் சம்பாதித்தனர். இன்னமும் சம்பாதித்துக் கொண்டு இருக்கிறார்கள்.

நிதி திட்டம் . சுருக்கம் (Financial Planning .Summary)

இதுவரை நாம் பார்த்த பதிவுகளின் சுருக்கம், கீழே கொடுக்கப்பட்டு உள்ளது.

முதலீடு வகை	பாதுகாப்பு (Safety)	வருமானம் (Returns)	எவ்வளவு விரைவில் பணம் எடுக்கலாம் (Ease of converting to cash)	குறைந்த பட்ச முதலீடு (ரூபாய்)
வங்கி சேமிப்பு	முழு பாதுகாப்பு	3 %	உடனடியாக	100 அல்லது 1,000 (வங்கியைப் பொறுத்தது)
வங்கி வைப்பு நிதி	முழு பாதுகாப்பு	8% (மாறலாம். ஆனால் இழப்பு இருக்காது)	ஒரு நாளில்	1,000 அல்லது 5,000 (வங்கியைப் பொறுத்தது)
தங்கம்/வெள்ளி	கொஞ்சம் பாதுகாப்பு குறைவு	10 % (மாறலாம். கொஞ்சம் இழப்பு இருக்கலாம்)	ஒரு சில நாட்கள்	1,000 (நகையாக வாங்கினால்). 5,000 (தங்கக் காசாக வாங்கினால்). 1,200 (பரஸ்பர நிதியாக வாங்கினால்)
வீடு , நிலம்	பாதுகாப்பு குறைவு	15% (மாறலாம். ஓரளவு இழப்பு இருக்கலாம்)	சில மாதங்கள்	சில லட்சங்கள்
பங்கு சந்தை ; பங்கு (Share)	பாதுகாப்பு மிகக் குறைவு. இதை வாங்கக் கூடாது என்பது என் கருத்து	-90 லிருந்து + 200 % வரை (மாறலாம், முழு முதலுக்கே மோசம் வரலாம்)*	ஒரு சில நாட்கள் **	5,000 அல்லது 10,000(உங்கள் புரோக்கரைப் பொறுத்தது)
பங்கு சந்தை: பங்கு பரஸ்பர நிதி (Diversified Equity Fund)	பாதுகாப்பு குறைவு	20% (மாறலாம். முதலில் 30% வரை இழக்க வாய்ப்பு உண்டு)	ஒரு சில நாட்கள் **	500 முதல் 5,000 வரை இருக்கலாம்
பங்கு சந்தை: வைப்பு நிதி-பரஸ்பர நிதி(Debt Fund)	ஏறக்குறைய முழு பாதுகாப்பு	7லிருந்து 8% (மாறலாம். ஆனால் இழப்பு இருக்காது)	3 அல்லது 4 நாட்கள்	1,000 முதல் 5,000 வரை இருக்கலாம்
பங்கு சந்தை: நடுநிலை பரஸ்பர நிதி (Balanced Fund)	நடுத்தர பாதுகாப்பு (பங்கு பரஸ்பர நிதிக்கும் வைப்பு நிதி-பரஸ்பர நிதிக்கும் இடையே)	15% (மாறலாம், கொஞ்சம் இழப்பு இருக்கலாம்)	சில நாட்கள்**	1,000 முதல் 5,000 வரை இருக்கலாம்
பங்கு சந்தை: துறைசார் பரஸ்பர நிதி (Sector Fund)	பாதுகாப்பு குறைவு. இதையும் நாம் வாங்கக் கூடாது எனக் கருதுகிறேன்	-50 முதல் +100% வரை*	சில நாட்கள்**	1,000 முதல் 5,000 வரை இருக்கலாம்

* இங்கு -90% முதல் 200% வரை என்று எளிமைப் படுத்தி சொல்லி இருக்கிறேன். இதன் பொருள் பல மடங்கு லாபமும் வரலாம், எல்லாமே இழக்கவும் நேரிடலாம் என்பதே. அடுத்து -50% முதல் 100% வரை என்று சொன்னால், சில மடங்கு லாபம் வரலாம், நிறைய இழக்கலாம் என்று பொருள்.

** சில நாட்கள் என்று சொன்னாலும், “தேவைப்பட்டால், விலை சாதகமாக இருந்தால் 3 அல்லது 4 நாட்களில் விற்று பணம் ஆக்கலாம். ஆனால், விலை சாதகமாக இல்லை என்றால் நாம் பல மாதங்கள் அல்லது வருடங்கள் விற்காமல் இருக்கும் நிலைக்கு தள்ளப்படலாம்” என்று பொருள்.

உங்களுக்கு தோன்றக் கூடிய சில கேள்விகள்:

1. ”எனக்கு தெரிந்து பலர் பங்கு சந்தையில் பணம் பார்த்திருக்கிறார்களே, நானே போன வருடம் பத்தாயிரத்தை பதினைந்தாக மாற்றினேனே, நீ ஏன் நேரடியாக பங்கு (stock)அல்லது துறைசார் பரஸ்பர நிதி வாங்க வேண்டாம் என்கிறாய்?”
2. இதில் ஏன் ULIP, NFO பற்றி எழுதவில்லை?
3. பரஸ்பர நிதியில் 10 ரூபாய்க்கு வரும் புது நிதி (New Fund Offer அல்லது NFO) குறைந்ததுதானே? அதைவிட்டு ஏன் அதிக விலை இருக்கும் பழைய நிதிதான் வாங்க வேண்டும் என்று சொல்கிறாய்?
4. பங்கு வாங்கினால் சில சமயம் டிவிடென்ட் தருகிறார்கள். பரஸ்பர நிதியிலும் சில சமயம் டிவிடெண்ட் தருகிறார்கள். இரண்டுமே நமக்கு வருவாய்தானே?
5. பரஸ்பர நிதியில் growth மற்றும் dividend என்று இரண்டு வித choice இருக்கின்றன. எந்த சமயத்தில் எது வாங்க வேண்டும்?
6. Reliance, SBI, DBS, Franklin Templeton, Birla Sun life என்று பல நிறுவனங்கள் பரஸ்பர நிதியை விற்கின்றன. எந்த நிறுவனத்தின் பரஸ்பர நிதிகள் நல்லவை?
7. ஒவ்வொரு நிறுவனத்திலும் 30 அல்லது 40 பரஸ்பர நிதிகள் இருக்கின்றன. எதை வாங்க வேண்டும்?

வேறு இருப்பின் பின்னூட்டத்தில் கேட்கலாம். தெரிந்தவரை பதில் எழுதுகிறேன். பதில்கள் அடுத்த பதிவில்.